Eyddum deginum úti á grasi í sólskininu með blöð og bækur. Ég varð fyrir smá vonbrigðum með afraksturinn, sést varla litamunur nema rétt í kinnunum. En eins og Maggi segir, það koma aðrir sólardagar. Maggi var svo að spila undir á tónleikum hjá íslenska barnakórnum og ég skellti mér enda von á kökum á eftir. Það brást ekki og var þetta eins og besta íslenska barnaafmæli með nokkrum ólíkum tegundum af súkkulaðikökum, hinni sívinsælu peruköku og svo ÖMMUKLEINUM! Tónleikarnir tóku varla hálftíma og voru voða krúttlegir. Þetta eru ekki nema um 8 stelpur og sumar svo litlar að þær voru bara að klóra sér og horfa út í loftið. Allir foreldrar voru auðvitað með myndavélarnar á lofti og videovélarna. Prestur íslendinga var þarna og heilsaði með kurt og pí. Hann býr víst bara hérna í húsinu við hliðina á okkur! Yndælis maður. Þarna var líka fólk sem sagði okkur að setja inn auglýsingu á síðu íslendingafélagsins um íbúð. Ætli við endum ekki á því.
Í gær eyddum við mestum hluta dagsins í að skoða hringa. Já, giftingarhringa. Lentum í því að þurfa nánast að útskýra að við vildum tvo eins hringa, því hérna er þetta þannig að fólk trúlofar sig með eins hringa og svo fær konan nýjan fyrir brúðkaupið. Við erum ekki búin að ákveða neitt en hvort um sig fallin fyrir svipuðum týpum, bara smáatriði sem munar á þeim. Við leysum það nú án slagsmála eins og við erum vön.
Ég er að vonast til að heyra frá leikskólanum sem ég talaði við varðandi vinnu núna í vikunni og bóka viðtal. Vona bara að þær hafi ekki gleymt mér, en umsóknarfresturinn er allavega útrunninn.
Hvernig er aftur þarna lagið: "blágresið blíða...." Datt það í hug þegar ég sá blágresi í Botaniska trjágarðinum áðan.
Engin ummæli:
Skrifa ummæli