Jólin í hnotskurn að hlaðast inn á myndasíðuna (nýja myndaalbúmið). Njótið vel

Afrekaði að fara bæði í Kringluna og Smáralind í gær með mömmu. Þurfti aðeins að skipta og ótrúlegt að við skildum bara lifa þetta af! Nei, það er ekki satt, það var alls ekki svo mikið af fólki og gekk eins og í sögu. Í dag á að halda áfram að slaka á og kannski fara í sund öll fjölskyldan saman. Ísak reyndar á mjög erfitt með að vera til síðan ragettur og flugeldar fóru á stjá og gengur um með hendur um eyrun. Það á eftir að taka á að upplifa gamlárskvöld:S Aumingja kúturinn hann er svo ofboðslega hræddur að hann sturlast alveg ef springur eitthvað þegar við erum úti. Og til öryggis heldur hann líka fyrir eyrun inni! Er að spá í að hafa bara I-podinn með og leyfa honum að hafa hann í eyrunum á morgun...

Annars óska ég ykkur gleðilegs nýs árs og passið ykkur á sprengjunum elskurnar

jólin... jólin...myndasjóv

Jólakveðja

Til allra vina og vandamanna
Fjölskyldan í Mosarima 11 óskar ykkur gleðilegra jóla, árs og friðar.
Þökkum allt liðið.
Hrafnhildur, Maggi og Ísak

P.S. Nýjar myndir í desemberalbúmi

hah

Ég er búin að vinna minn síðasta dag á stofunni! HAH! Við komum hins vegar heim með haug af dóti sem þarf að fara í gegnum og finna svo geymslustað:S Maggi og Ísak komu og hjálpuðu mér að pakka þessu smáræði en þar sem geymslan okkar er ansi full er spurning hvað hægt er að gera við þetta... Og ég NENNI EKKI að fara í gegnum þetta og flokka og sortera svona þegar maður vill helst vera bara í jólakortunum og smákökunum...

Við foreldrarnir erum að þreyta frumraun okkar í jólasveinamálum. Stekkjastaur kom og gaf Ísak glerkúlu með jólabangsa inn í sem snjóar á þegar maður hristir. Hann vildi ólmur sýna Jökli kúluna og tók hana með í gistinguna. Hún brotnaði. Það var víst ekkasog og mikil sorg yfir því. Daginn eftir hittum við Giljagaur á jólaballi og Ísak var svo hugrakkur að biðja hann um nýja kúlu. Sem þurfti náttúrulega að redda.... Maggi fór í þau mál, kom heim með nýja kúlu sem hann setti upp á fataskáp meðan hann fór úr skónum. Hún datt í gólfið og brotnaði!
Mamman fór svo í gær og kom heim með heila kúlu sem vonandi á lengri lífdaga... Mér finnst þetta samt voða gaman, þetta sveinka-mál og gaman að fylgjast með vaknandi áhuga Ísaks á þessu.

Litla barnið vex og vex. Kúlan orðin nokkuð stór og maður er farinn að finna fyrir miklu brambolti þarna inni. Eina nóttina í vikunni held ég barasta að barnið hafi brotið sér leið um allan kviðinn og stækkað um 10cm og 5 kíló í leiðinni!!! Það eru sko ekki minni læti en þegar Ísak var að brölta þarna inni. Grindin er nokkuð góð en lífbeinið skammar mig á hverjum degi.... bara fyrir að labba, standa upp og setjast... Ísak og Maggi eru svo farnir að syngja fyrir litla barnið á hverju kvöldi og svo kyssir Ísak magann og býður góða nótt. Nú segir hann að þegar litla barnið komi þá ætli hann með því í bað! Hmmm... verða kannski vonbrigði ef það gerist ekki strax og það kemur út? Já, þetta er spennandi

Jæja, kominn svefntími. Svefninn er enn í rugli hjá mér, sef stundum smá og stundum minna. Skrýtið hvað maður venst því að vera svefnvana! En mér finnst þetta auðvitað alveg glatað. Verður gott að komast í jólafrí. Og svo á ég mánudagana fría héðan í frá:D

Þá er jólakvefið mætt! Vonandi bara fer það sem fyrst, verst ef ég þarf að "feika það" á tónleikum Fílunnar á morgun! Ákvað að vera heima í dag enda með mjög alvarlegt slen og beinverki. En þetta er nokkuð árviss viðburður og verður vonandi ekki meira.

Annars erum við bara hress. Nú er aðeins farið að róast hjá Magga og við sjáum hann meira. Þá þarf að fara að klára jólagjafainnkaup og mig langar að baka smá, allavega gera piparkökur með Ísak. Við sáum svo flottar piparkökur í bók sem voru með íspinnum í til að halda á þeim:) Hann er voða spenntur yfir þessu. Nú er aðal-leikurinn að taka fram allt eldhúsdótið (matinn og áhöldin) og leggja á sófaborðið og fara í kokkaleik. Þá er hann kokkurinn og ég stelpan og ég á að kaupa ALLAN matinn og það er bara tekið við greiðslum með korti sko. Hann fattar engan veginn þetta með peninga haha enda aldrei séð það eiginlega.

Svo er hann óendanlega spenntur yfir Stafakörlunum núna, fékk bókina í afmælisgjöf og svo diskinn í gær og vill ekki sleppa honum! Gaman að því.

En nú ætla ég að leggja mig áður en ég drösla mér í sturtu og svona. Erum nefninlega að fara að gera konfekt á eftir með tendgdafjölskyldunni. Verður án efa mjög gaman:)

Nýjar myndir

Takk fyrir afmæliskveðjurnar. Nú eru komnar myndir úr báðum veislunum inn í nýja myndaalbúmið.